Contrórdene, tornemo so WP par sparagnar tenpo inte ƚa gestion.
Xé pasà 13 ani da che gavemo moƚà WordPress e tanta acua soto i ponti, bona e manco bona, ma semo senpre cuà. Par ste tre-cuatro comunicasion a’l ano che femo, xé pì che suficente un blog ospità so un server estèrno in cui tuti i problèmi de manutension i xé in carga de WP.
I nòmi a dominio de i nòstri siti invense i xé senpre i stesi: http://www.elgalepin.info par el blog, elgalepin.com par el galepin vero e pròpio e elgalepin.org par spìrito sportivo.
Riportemo ƚe novità de i ùltimi mexi deƚongo cuà soto:
Ùltime so ƚa tastiera Venetia&Histria
Co’ tanti ani de servisio, nisun problèma, ƚa tastiera ƚa funsiona poƚito so Windows e smartphone Android o iPhone. So Linux dipende da ƚa distro e no podemo dar sugerimenti parché ghe xé masa varianse.
Co’ i ùltimi axornamenti de Windows, Microsoft ƚa xé drio far ƚe sòƚite fufigne. Càpita che co’ version recenti de Windows 10 o 11, co se istaƚa el Keyman co’ ƚa so montura de tastièra, o sinò ƚa tastièra da drento el Keyman co’ ƚa funsion “Download/Descarga”, ƚa Venetia&Histria a vòlte ƚa vien sforsada a doparar el layout de tastiera “US”, che pol andar ben par chi che i vive in USA, ma inte ‘l rèsto de’l mondo, màsime in Braxil e inte ƚa Venetia stòrega, i se cata in problèmi aparentemente insormontàbiƚi, come se ghe fuse un “bao” so’l software. Ƚa tastiera V&H no ƚa gà gninte che no và, sto problèma el ghe xé anca par altre lengue in altri Paexi (grasie, Microsfot). Sègui ste istrusion:
- Descarga el Keyman da so pòsta (“without any keyboards”), invense che co’ ƚa tastiera desernìa
- Istaƚando el Keyman definisi el “layout” primario de’l sistèma (da noaltri “Italian” – eventualmente prima elìmina da’l sistèma altri layout che no i sèrve a gninte, i ghe sèrve nòma che a Microsfot)
- Descarga el file “kmp” da sto link (desconpata el zip)
- Da ƚe inpostasion de ‘l Keyman (configuration/layout) clica “Istaƚa tastièra” (e nò “Descarga tastièra”) e inpòrta el file “kmp” che te gà descargà
- Senpre in “confegurasion” de Keyman, definisi lengua de interfacia, preferense e scavesagne come che te piaxe mèjo, e taca a laorar
Co’ ste fature, funsiona poƚito tute ƚe nòstre tastiere, vèneta, rusa, latina, so tuti i Windows, e ƚe funsionarà anca so tuti i PC co’ tastiere hardware braxiliane, todesche, svedexi o vatelacata. Scrivi in cualsesipia variansa de lengua co’ Ƚ/ƚ, ẑ, ž, ʒ, ṅ, ł, š, č, ć, ā, ă, â, ō, ē, ĕ, ċ, ö, ü, ø, œ, æ, ż, ṡ…
До свидания, друзья!
Ùltime so ƚa custion “https”
No xé gninte dificoltoxo inplementar i “sertìfeghi” so ƚe pàxine de i siti de el Galepin, ma costa tanto tenpo che no val ƚa pena de pèrder. El sito el funsiona in “frame”, e no pol èsar altrimenti par uxufruir de tute ƚe comodità previste, par cui se gavarìa da modifegar un strafujo de link manualmente par evitar confliti. Ƚa custion de ƚa navegasion in “https” inte ‘l caxo de ‘l nòstro sito no ƚa gà nisun motivo de èserghe. Autorixa e nàvega sensa farte problèmi, nisuni i te domandarà dati de carte de crèdito o altro so ste pàxine (se sucede, sapi che te sì so naltro sito).
Comunicasion de servisio – PayPal
*
Gavemo eliminà el servisio e el nòstro conto in PayPal a motivo de ƚa so poƚédega rasista contro ƚe persone rexidente in Federasion Rusa.
*
We’ve removed the PayPal/Credit Card method and eliminated our PayPal account because of their racist policy against Russian citizens.
I sostenidori i pol senpre contribuir sensa doparar euri e carte de crèdito/dèbito. Da cuà invanti in Bitcoin so LN address o LNURL. Se te vol contribuir co’ “invoice” contata elGalepin da’l messenger. Gramarsè e a presto. Cualsesipia cifra, so’l Lightning Network no ghe xé — e no ghe và — comision a nisuna banca! Tanti o pochi SAT no inpòrta, grasie comuncue. (Ƚa manutension de “el Galepin” -26 ani de atività- ƚa gà un costo no da poco).
Lightning Address:
0x180f3a607f699948@sats.mobi
El galepin - Blog 