Tuti i conose xà ƚa pàxena de concentramento de i software in lengua, ma riportemo oncora el link parché ne xé vegnùo in recia novità interesante. El navegador de internet Maxthon el gà novità senpre pì potenti. Oncora de pì, a nialtri ne intarèsa che xé avansà anca ƚa tradusion vèneta de ‘l software.
Sto ano ƚa doménega de Pasion ƚa pòrta sta novità de ‘l cìnema, ƚa ùnica edision a ‘l mondo sensa censure de ‘l tèsto (sototìtoƚo) par el famoxo film de Mel Gibson:
Vedi ƚa Playlist che se pol catar so youtube, co’ i clip de exenpio.
————–
Gnanca fenìo de dirlo, cioè de scrìvar el blog de jèri, e, come na profesìa, se gà verifegà indilatamente el maron. Poche ore pì tardi defati, ƚa comunicasion de l’Euròpa co’ i server mericani, conprexi fior de servisi come “yahoo grupi”, wordpress (cuindi anca sto blog), el steso veneto.org, el nòstro moodle, e tanti altri, ƚa xé deventada inposìbiƚe. Par ore e ore un strafujo de siti i xé stài fora linia. Gà continuà come un trèn el mirror europèo de “el Galepin” non line elgalepin.com/mirror1 e anca el portal elgalepin.org.
Èco parché xé mèjo, par chi che i stà so’l continente de i vèci, doparar senpre el mirror europèo, e, senpre par el vicevista de ‘l “de ƚà e de cuà”, da’l continente de i bòce convien vixitar el server merican.
Downtime de 0% confermà.
Dapò scuaxi un ano xé canbià ƚe schède de detalio de ‘l galepin on line, no tanto par i contenudi, ma par ƚa eficensa. Xé stà eliminà uno de i do servisi de spedision de ƚe schède par email (tanto a sta ora tuti i gà inparà a doparar anca staltro “sconto” soto el botonsin, che el permete de mandar email, salvar segnaƚibri, signaƚar a social network). Ƚa pàxena dèso ƚa rexulta pì ràpida da descargar. Tegnindo conto anca che tuti do i server i xé stài migrài so sistèmi pì performanti, dèso ƚe prestasion, de cuà e de ƚà da ‘l ocèano (o de ƚà e de cuà, drio el ponto de vista de chi che i scrive e chi che i lèxe, co’ ƚà che pol ser considerà cuà e cuà, ƚà), ƚe gà da èsar al top, e co’ un downtime de 0% a tute ƚe ore de tuti i xorni de tuto ‘l ano, sensa trascurar menuti e secondi. Altri bàgoƚi da servisi estèrni i xé stài spostài soto i dati, cusì, se i daxese problèmi, se gavarìa insteso da poder lèxer ƚa schèda.
El teatro el xé senpre stà un mèxo potente de trasmision de ƚa cultura vera e viva, cusì da nialtri come dapartuto (pensemo a ƚa gran tradision inglexe). Speremo che in futuro el torne senpre de pì, a Dio piaxendo che sparisa tute ƚe manifestasion de volgarismo inperanti ancùo (teƚevixion, grandi fradèƚi, tribune letoraƚi, ect..).
Internet el fà ƚa so parte, e chi che i gà oportunità de ser cuà co’ nialtri on line, no ‘l pol pèrdarse tanti pìcoƚi texòri che i demostra che ƚa tradision de teatro vèneta ƚa ghe xé oncora, e ƚa continua a prodùxer taƚenti de tuto rispèto (mai bastansa apriexài). Èco do tocheti divertenti, da ‘l sòƚito Goldoni e da’l Testoni.
Chi che i nàvega da ste bande i se gavarà xà incòrto che da calche tenpo xé stà xontà de ƚe funsion ùtiƚi a elgalepin on line, ma magari poco vixìbiƚi. Oltra che i bàgoƚi de i servisi estèrni, so ƚe schède de detalio dèso, a pasando co ‘l mouse sora ƚa baƚeta coƚorada, se pol védar na sigla de promemòria; rèsta senpre oviamente ƚa posibiƚità de vèrxar ƚa mapa inte na finèstra estèrna (se gà da consentir i “popup” da ƚe preferense de ‘l programa de navegasion).
Dèso ghe xé anca ƚa funsion de “anbiente”, cusì se sà senpre indove che se xé drio sercar e no se sbalia a inserir paròƚe inglexi in vèneto, talian, o vicevèrsa. Ƚa pàxena de i rexultadi ƚa gà senpre un fondo verdin par el talian, vioƚeto par el vèneto, e banana par ‘l inglexe.
Grasie a i suxerimenti de i utenti, cueƚo che se pol far ƚo femo voƚentièra.
El blog par “el Galepin” on line, da mòdo che podemo tegnir axornài i utenti de ‘l galepin pì estexo che ghe xé, co’l bàgoƚo pì de mòda che ghe xé. Inte sta època, pararìa che se no te blòghi (blogati… bloghexi…) no te sì nisun, infinamente.
Xé pasà trè ani da che xé on line ƚa version niova de ‘l sito e xé in programa un axornamento de ‘l material consultàbiƚe par el 2011, ma intanto continua a nar vanti de tuto e de pì. E ƚora, inte sta sesion de blòghi… bloghixi… blogamenti… insuma, so ƚa sesion “Niove da el Galepin” de sto blog sercaremo de tegnir a xorno i utenti so cueƚo che sucede in caxa elGalepin, indove che se laora tuti i dì par far cheƚa òpara de cataƚogasion, conservasion, salvamento, socorso e cura, de ƚa lengua.
Ghemo anca intension de rénder i utenti pì ativi co’ “surveys” (pena che riusimo a saver còsa che vol dir) e altre inisiadive.
El galepin - Blog 